नागपूर ः नागपूर विभागातील तीन हजारांवर माथाडी कामगारांना दिवाळी बोनस देण्यात येणार आहे. याकरिता पाच कोटी ६० लाख रुपयांची तरतूद करण्यात आली आहे, अशी माहिती नागपूर व वर्धा जिल्हा माथाडी कामगार असरंक्षित कामगार मंडळाचे अध्यक्ष व सहाय्यक कामगार आयुक्त राजदीप धुर्वे यांनी दिली आहे. यामुळे माथाडी कामगारांमध्ये आनंदाची लहर असल्याचे दिसून येते.
नागपूर आणि वर्धा माथडी व असरंक्षित कामगार मंडळाअंतर्गत तीन हजार ८२८ माथाडी कामगार कार्यरत आहेत. त्यांना योग्य प्रकारे सुविधा देण्याचे काम मंडळा मार्फत करण्यात येते. यावर्षी माथाडी कामगारांची दिवाळी आनंदात जावी याकरिता ५ कोटी ६० लाखांची बोनससाठी तरतूद करण्यात आली आहे. ही प्रत्येक माथाडी कामगारांच्या बॅक खात्यावर जमा करण्यात आली आहे. अप्पर कामगार आयुक्त (विदर्भ विभाग) नितीन पाटणकर यांच्या मार्गदर्शनात आणि सहाय्यक कामगार आयुक्त राजदीप धुर्वे, मंडळाचे सचिव एम.पी. मडावी यांच्या नेतृत्वात हे नियोजन करण्यात आले.
